“El telespectador que vea ‘Tierra de quesu’ va quedar como nós; va plasmar de la realidá tan diversa que tenemos”, afirma Estrada

El cocineru Lluis Nel Estrada y el realizador Pablo Casanueva van averar al públicu asturianu "la potencia que tien la cultura quesera asturiana" en ‘Tierra de quesu’, serie documental n’asturianu dafechu de cuatro episodios que va estrenar esti miércoles TPA. “En realidá van conocela de los propios queseros”, esplica’l consultor gastronómicu, qu’afala a apostar polos productos del país.

“Conceptualmente ‘Tierra de quesu’ ye un viaxe nel que Pablo, como realizador y director, y yo percorremos 1.500 quilómetros en cuatro díes visitando queseríes artesanales”, apunta Estrada, espertu que va introduciendo a Casanueva, con nociones básiques sobre esti mundu al nivel que cualquier ciudadanu, sobre la realidá quesera asturiana. “Nós somos meros conductores, porque los protagonistes son los queseros y los quesos, encargándose Pablo de tresmitir llueu al telespectador el resultáu final del viaxe”, añade.

Una propuesta n’asturianu dafechu que naz de la convocatoria ‘Asturies crea cultura / Asturies crea sinerxes’ entamada pola Conseyería de Cultura, Política Llingüística y Turismu y RTPA pa entamar producciones de calidá en llingua asturiana, pero que tien el so niciu más atrás. “La idea tien 7 o 8 años yá, cuando Pablo, tamién de Ribeseya, me propunxo introducir la so película ‘Bernabé’ na presentación ellí. Yera un guaḥe, pero teníamos una conciencia de la realidá asturiana mui asemeyada y coincidimos en qu’había que facer dalgo sobre los quesos porque nun había nada sobre ello. Presentámosla 2 o 3 vegaes a la TPA, ensin ésitu hasta agora, cuando tuvimos que modificala p’adaptala a les bases d’esti concursu, siendo l’orixinal entá más ambiciosu”, rellata.

El resultáu final, sicasí, ye mui satisfactoriu. “Son cuatro capítulos dedicaos a zones xeográfiques: la costa oriental, Picos, el centru y l’occidente”, apunta Estrada, siendo’l primetu mañana, a les 22.30 hores en TPA, l’entituláu ‘De les Peñameyeres a Maliayo. Los quesos asturianos cerca la mar (la costa)’.

Van siguir ‘Los Alpes queseros d’Asturies. L’orixe del Beyos, Gamonéu y Cabrales (oriente)’, ‘El Centru d’Asturies. Los quesos del corazón del país (centru)’ y ‘De Grau a Taramundi. Onde’l quesu pasa a llamase queisu (occidente)’. Nellos el telespectador va conocer les particularidaes de cada quesu que se produz nes queseríes que visiten y les problemátiques qu’atopen los sos productores, “que son diferentes según el llugar, porque por exemplu pa los del Gamonéu del Puertu, que tienen tola producción vendida, ye la falta de relevu xeneracional o’l llobu, y pa otros ye la estaya comercial, porque vendelu ye munches vegaes más difícil que facelu”.

Dos revoluciones queseres

Estes queseríes artesanales nacieron nes dos revoluciones queseres que considera Estrada, una primera nos años 80 “cuando colos escedentes de lleche s’empieza a facer quesu p’algamar un valor añadíu, apaeciendo queseríes con rexistru sanitariu y la primera Denominación d’Orixe Protexida, Cabrales”, a les que llueu siguiríen-y otres, y una segunda a partir del 2008, col entamu de la crisis económica. “Hai un cambiu de paradigma nesti sieglu con respeuto al consumu de lo llocal, y ente los queseros tamién. Hai más afinaciones colos productos y nuevos métodos, asina como un cambiu na forma de comercializar”, esplica.

Dos momentos que’l telespectador va poder intepretar nesta serie documental, que tamién incorpora en cada capítulu visites a establecimientos pa conocer recetes, prebes o maridaxes de productos venceyaos col mundu de la lleche o’l quesu. “El que vea ‘Tierra de quesu’ va quedar como quedamos nós; va plasmar de la realidá tan diversa que tenemos”, adelanta Estrada.

“Munches vegaes repetimos como loros que somo la mayor mancha quesera d’Europa, pero la xente sabe qué ye’l Cabrales, el Gamonéu y l’Afuega’l Pitu, y probó’l Casín y dalgún más; nun conoz la potencia que tien la cultura quesera asturiana. Con esta serie va conocela y va entendela”, rellata. “Hai qu’apostar por ella pa que tenga futuru, como consumidor lo primero, dalgo que podemos treslladar a tola realidá productiva del país, un país pequeñu xeográficamente con un bayura de productos enorme y de calidá”, rescampla l’espertu.

Na semeya, Casanueva, con Estrada detrás, graba'l trabayu nuna quesería d'Alles. Semeya obra de Patricia Martínez.