El Tartiere volvió a facer la fola

El Real Uviéu impúsose al A.C.F. nun partíu que los de Rivas dominaron en tou momentu y nel que los goles nun llegaron hasta la segunda metá. Ensin xugar bien, los xugadores azules tuvieron abondes ocasiones de gol na primera parte, pero nunca nun foron capaces de batir al rebatiador del A.C.F. Na segunda parte, dempués d'un gol pantasma de Benxamin a la salida d'un corner, llegó'l golazu de la tarde. Darío recibió un gran pase de Juanchi y dempués de dexar nel suelu a dos contrarios mandó'l balón al fondu la portería de Dani Lastra, una preciosa xugada que sirvió p'animar al públicu del estadiu.

Tres d'esti gol la mayoritaria afición del Real Uviéu espresó tolo que tien dientro dende'l descensu p'acá y entamó a pidir la presencia de Diego Cervero, verdaderu ídolu local. Rivas fízo-y casu a l'afición y pa rematar la nueche, combinación d'Aldeondo con Cervero, que remata l'uvieín con un bon gol que provoca'l deliriu na grada.

D'equí al final dalguna ocasión más del Uviéu a la contra y sobre too fiesta na grada con recuerdos pa toos (Jon Carrera no positivo y l'Alcalde la ciudá, que recibió los xiplos de tola grada, no negativo). Diba tiempu qu'al públicu del Tartiere nun-y prestaba tanto un partíu, y incluso la fola fizo una afición desbordada pola alegría.

Trés coses quedaron perclares nesti partíu: esti ye un equipu más sólidu y fechu que'l del añu pasáu; la xente del Uviéu sigue alcordándose de lo que pasó y nun perdona; y l'afición sigue a muerte con esti equipu. A fin de cuentes, victoria xusta nun partíu que si bien nun tuvo la tensión nin la xente del añu pasáu cuasique llegó a les 10000 persones nes grades que disfrutaron enforma d'una victoria que pa los aficionaos tenía munchu más valor y significáu que'l de los trés puntos na clasificación.