El suroccidente del país va disponer d'un programa específicu sobre quemes

|
El suroccidente del país va disponer d'un programa específicu sobre quemes

Pa la so prevención, estinción y investigación.

El conseyeru de Presidencia y Participación Ciudadana, Guillermo Martínez Suárez, aconceyó ayeri colos alcaldes de la rexón en compañía de la conseyera de Desarrollu Rural y Recursos Naturales, María Jesús Álvarez González, alcuentru celebráu n'Ayande nel que-yos informó del desarrollu d'un programa específicu sobres quemes nesti territoriu. “Tomando en considerancia la singularidá de la contorna suroccidental, qu'afeuta a la incidencia y los comportamientos nuevos de les quemes forestales, vamos diseñar un programa concretu d'actuación nesta materia”, sorrayó'l Martínez Suárez.

Esta iniciativa, enmarcada nel Plan Especial pa los Conceyos del Suroccidente, persigue profundizar nel conocimientu de les causes, tendencies y evolución de los fueos nesta zona y avanzar na sensibilización y participación ciudadana. El proyeutu va combinar trés fases estremaes: diagnósticu, participación y definición d'oxetivos. Pal so diseñu, el Gobiernu va implicar a coleutivos como'l Serviciu d'Emerxencies (Sepa), la Guardería del Mediu Natural, cooperatives forestales, agrupaciones de Proteición Civil, ganaderos, llabradores y grupos ecoloxistes.

Según informen dende l'Executivu, la Brigada d'Investigación de Quemes Forestales (Bripa) del Suroccidente, con sede en Cangas, investigó l'añu pasáu 27 fueos: 9 en Cangas, 9 en Tinéu, 5 n'Ayande, 3 n’Ibias y ún en Degaña. D'ellos, 24 foron intencionaos, el 89 por cientu del total.

 

Contador Estadistiques