El Suatea pide rempuestes

El SUATEA, tercer sindicatu asturianu con más representación na ensiñanza, presentó un escritu na Viceconseyeria d'Educación pa esixir midíes urxentes en rempuesta a la riestra d'agresiones a la llingua asturiana y concretamente a la negativa del MEC a que l'asturianu seya una asignatura más na LOGSE.
Nun testu bien duru, el sindicatu d'ensiñanza acaba pidiendo al Gobiernu asturianu que declare la oficialidá. El sindicatu llega a la conclusión de que con una situación llegal precaria como la que tenemos y una falta de voluntá política como la que demuestra l'Alministración autonómica asturiana ye normal que se llegue a estes situaciones, polo que "la única ferramienta amañosa pa la presencia del asturianu na vida escolar y na social ye la Oficialidá. De nun ser asina, pocu futuru-y espera a la nuesa llingua, a la llingua del nuesu pueblu. Yá nadie pue negar la necesidá de la Oficialidá y, si lo faen, tán dexando claro a tol pueblu asturianu'l so interés de qu'esta llingua desapaeza. Poro, SUATEA desixe nel so escritu a la Viceconseyería d'Educación qu'entame a dar los pasos necesarios dientro'l Gobiernu Asturianu pa que'l mesmu anicie los trámites pa declarar la Llingua Asturiana como llingua Oficial". El sindicatu acaba'l comunicáu diciendo que "De nun ser asina esti sindicatu, y xulgamos qu'una parte importante de la sociedá asturiana tamién, entenderá que per parte d'esa Viceconseyería nun hai un rispiu d'interés pa cola nuesa llingua, y que l'oxetivu claro de la mesma ye l'esaniciu dafechu d'esti bien cultural de primer orden, la llingua del nuesu pueblu".D'otra parte, y referiéndose a la Llei d'Usu, Suatea solliña que llevamos dos años con unes disposiciones llegales que permiten un mayor desarrollu de l'asturianu na educación, pero nun ta faciéndose un res. Suatea aprovecha pa pidir que la Conseyería rotule les sos oficines n'asturianu, y xulga como grave sobremanera el que bien d'empreses particulares tean emplegando l'asturianu colos sos clientes mientres les instituciones públiques como la conseyería nin siquiera se molesten en dar esti pasu tan cenciellu