El Sporting va abrir la Lliga 2011-2012 tres la decisión de los futbolistes de desconvocar la fuelga

|

El Sporting va abrir la Lliga 2011-2012 esti sábadu (18 hores, El Molinón) ante la Real Sociedad depués de que los futbolistes llegaran a un alcuerdu cola LFP na mañana del xueves. La primer xornada pasa a disputase al final de la primera vuelta.
 
Les dos partes calificaron como satisfactoriu l’alcuerdu, que va permitir la creación d’un fondu salarial nuevu, del que tovía nun se conocen les cantidaes; va permitir a los xugadores que lleven trés meses ensin cobrar a desvinculase del club; y va garantizar el cobru de les nómines a los futbolistes d’equipos que desciendan de categoría. D’esta forma, la competición torna a la normalidá y esta fin de selmana va disputase la segunda xornada en Primera y Segunda División.
 
Sporting y Real Sociedá van ser los dos equipos que tengan el privilexu d’estrenar esti añu la Lliga al tar programáu el choque ente asturianos y vascos pal sábadu a les 18 hores. Manolo Preciado va recuperar pal partíu a Lora y Iván Hernández, que s’entrenaron güei con normalidá, y va tener como baxes pal sábadu a Nacho Cases y Bilić. Otra manera, Alberto Botía foi convocáu por Vicente del Bosque pa xugar cola seleición estatal absoluta en St. Gallen (Suiza) contra Chile (2 de setiembre) y en Logroño ante Liechtenstein (6 de setiembre). El murcianu ye’l primer xugador del Sporting en recibir la llamada d’un seleicionador dende Julio Salinas.
 
Modificación del calendariu
 
La primer xornada de Lliga, que nun pudo disputase pola fuelga de futbolistes, pasa a celebrase'l 20 de xineru, cuando debería xugase’l primer partíu de la segunda vuelta. Por ello, la xornada 20 treslládase al miércoles 2 de mayu. El Sporting va enfrentase nestos dos choques col Villarreal.

Contador Estadistiques