El Sporting sigue ensin ganar fuera de El Molinón

Mal partíu'l que xugaron ayeri Córdoba y Sporting nel campu de El Arcángel y nel que la falta de precisión y pegada del Sporting volvió a privar al equipu asturianu del trunfu que los de Marcelino precisen pa tar arriba na clasificación, col agravante de facelo ayeri contra un rival que tien un pie metíu dafechu na segunda B y que llegaba estráu de baxes, sobremanera nes llinies defensives.

Con too y con ello, el Córdoba salió a garrar al Sporting col pie cambiáu y fizo una salida de restallu, poniendo un tiru de Montenegro'l primer peligru pal equipu local. Sicasí, al volador del Córdoba acabóse-y la pólvora bien ceo y el partíu convertióse darréu nel clásicu choque ente dos equipos de segunda ensin rixu nin calidá, col Sporting apertando un poco más y col Córdoba buscando la salida a la contra. Foi hacia la media hora de xuegu que'l Sporting tuvo la ocasión más clara nun pase de David Bauzá que remató en dirección a gol Pablo Álvarez, pero'l balón acabó nes manes del porteru cordobés Saja, que tuvo una gran intervención.

Nel segundu tiempu'l Córdoba garró un perfil más ofensivu y echóse lliteralmente enriba de la portería de Roberto. Montenegro llegó a marcar un gol, pero l'árbitriu anuló la xugada al apreciase un orsay del delanteru local. El Sporting vía peligrar l'empate y engurrióse nel so campu, momentu en que Marcelino decidió da-y un reblagu al equipu cola entrada de Biagini y Juan. Un Sporting más revolvín buscó entós el gol ensin mayor fortuna, fallando Cristian Díaz l'últimu cartuchu pal Sporting n'otra ocasión clara.