El Sporting remontó-y al Elche

El Sporting caltién encesa la llaparada de la ilusión. Tres de ganar ayeri al Elche, una de les besties negres del equipu asturianu, los de Marcelino tan a nueve puntos del ascensu, una diferencia grande pero que l'equipu va enfrentar con más moral dempués de ganar al Elche, el mesmu conxuntu que ganare en Copa y Lliga al Sporting nel mes d'ochobre paeció ayeri un equipu ensin rixu nel campu d'El Molinón, y, anque los de Josu Uribe llegaron a adelantase, dende un entamu tuvo claro que quien tenía'l mandu del partíu yera'l Sporting. Con too y con ello, el dominiu nel xuegu de los asturianos desfacíase nos metros finales, nos que'l remate paecía llabor imposible. Pa la moviola de la primer parte quedó una xugada na qu'un futbolista del Elche pudo tocar el balón cola mano dientro del área.

Col segundu tiempu llegaron los goles y l'espectáculu, yendo la emoción de menos a más a lo llargo de los 45 minutos. En primer llugar, tuvo'l gol del Elche. Ismael llevó'l balón énte la nula oposición de Chus Bravo y púnxo-y un balón d'oru molío a Luis Gil, que quedó solu énte Roberto batiéndolu ensin problema. Poco diba durar l'alegría del Elche, y ye que, poco enantes del gol ilicitanu, Marcelino diéra-yos entrada a Juan y Biagini. L'Arxentinu y el de Prevera revolvieron al Sporting y confirmaron el dominiu total del equipu asturianu, ayudando a convertilu en goles. L'empate llegaba nel 71 nun penalti de Trotta a Pablo Álvarez que convertía Biagini, y, en namás trés minutos, yera otra vegada l'arxentinu'l que robaba un balón y centraba a Juan pa que l'asturianu-y la diere dende la banda izquierda a Calandria, que ponía en ventaya al Sporting. Los diez minutos que vinieron dempués foron un monólogu sportinguista que terminó col deliriu de l'afición na xugada del 3-1 definitivu, obra de Juan. El de de Prevera, viendo adelantáu al porteru del Elche, picó'l balón cola zurda dende más de 25 metros lo xusto pa qu'entrare pela escuadra. Darréu del gol, y ente los aplausos del públicu, l'árbitriu pitaba'l final d'un partíu que tuvo un aquello de venganza contra un equipu que dañare muncho al Sporting, que d'otra manera, suma cinco trunfos seguíos nel Molinón.