El Sporting regaló l'empate

El Sporting regaló-y l'empate al Salamanca nun partíu en que'l Molinón vivió otra vuelta un ambiente de primera división. Los salmantinos salieron al ataque y acorripiaron al conxuntu de Marcelino el primer cuartu d'hora, una imaxe que'l públicu d'El Molinón nun ta avezáu a ver. Pasáu el dominiu visitante, los de casa espurrieron les llinies y yá de la qu'acababa la primer parte tuvieron ocasiones clares con un tiru de Bilic que salió fuera per poco. Nel segundu tiempu, la presión asturiana frutió nun penalti que tresformó Dani Borreguero. La ventaya asturiana pudo enanchase con un segundu penal, pero esta vegada Borreguero echó'l balón en manes de Stelea. Entós, na única ocasión del Salamanca en tol partíu, el exsportinguista David Cano empató una volea que batió a Roberto, asitiando en marcador el 1-1 definitivu. El Sporting arrolló nel final del partíu, pero ensin ser a marcar. Anque'l Sporting lleva trés partíos ensin ganar, l'entrenador sigue enfotáu nel conxuntu y dixo que'l so equipu xugó muncho meyor que'l Salamanca. El Sporting sigue lider con trés puntos de ventaya sobre'l segundu, qu'agora ye'l Numancia y un marxe de siete sobre la zona d'ascensu.