El Sporting presenta la camiseta roxiblanca pa esta temporada

Tres la polémica pol modelu fechu pola marca italiana Kappa como primer equipación del Sporting, bautizáu pola afición como ‘el piyama’, el conxuntu xixonés yá dispón d’una camiseta más clásica. Falta por ver si va tar pal estrenu en Lliga.
 
El primer partíu de los xixoneses va disputase la fin de selmana del 21 d’agostu n’El Madrigal contra’l Villarreal, estadiu onde ye posible que los roxiblancos tengan que xugar cola segunda equipación, collorada y con una franxa nel hombru dorada. Esta camiseta ye la que vien utilizando’l Sporting tola pretemporada y cola que va estrenase ante la so afición el sábadu 13 d’agostu (21.30 hores) nel Villa de Xixón –antiguu Costa Verde– frente al Genoa. D’esta forma, como mandó’l presidente Manuel Vega-Arango, los roxiblancos eviten xugar cola que diba ser primer equipación pa esta temporada tres el refugu ampliu qu'hubo ente l’afición, anque queda por ver si mañana en Paços de Ferreira xuega con ella pa da-y ‘oficialidá’, yá que va quedar como cuarta equipación.
 
La camiseta roxiblanca nueva, que sustitúi a la ellaborada nun primer momentu por Kappa nel que predominaba’l blancu sobre’l colloráu, va estrenase nel primer partíu de Lliga n’El Molinón contra la Real Sociedad, partíu que va tener llugar na fin de selmana del 28 d’agostu, anque nun va tar a disposición de los aficionaos nes tiendes hasta un tiempu depués. Mentes, el ‘piyama’ va permanecer como primer equipación de los equipos de base.
 
Otra manera, el Sporting xugó ayeri en Salamanca’l primer partíu de la so xira pel noroeste de la Península Ibérica, onde ganó a la Unión pol resultáu de 0-4. Barral abrió’l marcador nel minutu 9 y Ayoze y Luis Morán ampliaron la cuenta enantes del descansu. El cuartu gol foi obra del Sangoy, yá nel tramu final del partíu. La mala noticia pal equipu roxiblancu foi la lesión del xugador del filial Mendy, que sufre un esguince del ligamentu llateral internu de la rodiya izquierda que pue impedir al senegalés completar la pretemporada.


Imaxe sacada de la web del Real Sporting de Gijón, S.A.D.