El Sporting pierde en Xerez

El meyor Sporting de les últimes selmanes perdió en Xerez con dos goles anulaos y dos espulsiones nun partíu en que pasó en toles estadístiques a los locales que tamién acabaron con 10 futbolistes en campu. L'agua tamién emporcó'l desarrollu d'un alcuentru raru enforma

El Sporting llegaba a Chapín de favoritu, pero tres d'unes poques llegaes asturianes al área del Xerez, del Pino remató a gol una contragolpe que dexó varaos a los asturianos, que pudieron acabar el primer tiempu con 2-0 de nun fallar Mena cuando quedó solu con Roberto enfrente. Con too y con ello, nun fizo falta llegar al segundu tiempu pa que los de Marcelino esconsoñaren, y ello foi que lo ficieron como nunca. Col Sporting afogando a los andaluces nel campu d'ellos, el Xerez namás podía xugar a la contra, pero fallaba l'aciertu. Mientres, los guajes entreteníense tolo que podíen en devolver el balón al campu p'aselar a un Sporting que merecía muncho más

Llegóse asina a un tiempu de descuentu p'alloriar nel que'l Sporting empató con gol de Rubén a asistencia de Cristian Díaz, que foi, xunta Rubén y Mate Bilic, lo meyor na delantera del Sporting. Precisamente Cristian marcare enantes un gol inxustamente anuláu por supuesta falta d'Ismael. Una segunda asistencia de Cristian Díaz a Rubén remachóla'l fíu de Cundi con un cabezazu qu'atayó'l rebatiador andaluz nuna salida espectacular, pero ehí taba Mate Bilic pa meter a portería'l balón. Pena que lo ficiere cañicándose enriba d'otru xugador, colo que'l tantu quedó anuláu.

L'árbitrio tenía de xugar un papel importantísimu nesti alcuentru, y ello de manera llamentable pal Sporting. Xunta'l gol anuláu a Cristian, el referí nun vio un penalti en cada área pero sí que pitó'l que cometió Pablo Álvarez nel últimu momentu y que-yos daba'l trunfu final a los de casa