El Sporting pierde en Córdoba

La racha de resultaos positivos del Sporting de Xixón franció en Córdoba, precisamente la ciudá onde más vegaes tien ganao fuera de casa l'equipu asturianu. L'árbitrio Arcas Piqueres, de mal recuerdu pa la parroquia astur, y el bon xuegu del rival tarazaron la trayectoria d'un Sporting qu'acabó xugando con 9 pero que nunca nun dexó d'atacar.

El Sporting salió bien, pero'l Córdoba tamién xugó al ataque. Col partíu abiertu, l'andaluz Villa entamó una xugada nel minutu 10. El capitán sportinguista, Samuel, cortó'l balón, pero l'árbitrio vio mano del asturianu y echólu por encarnada directa. El penalti que vieno darréu d'ello dio-y la primer ventaya al Córdoba y franció la racha del porteru Roberto ensin llevar goles, que quedó a la fin en 831 minutos. Dos minutos dempués, l'árbitrio pitaba otru penal, esti al favor del Sporting, por derribu de Juanmi sobre Pablo Álvarez, pero Bilic fallólu. Con too y con ello, el croata consiguió l'empate nel minutu 35, resultáu col que se marchó pa la caseta. A la vuelta del descansu, el Sporting intentó aposentar el partíu, pero nel 54 Montenegro batió a tola defensa y a Roberto nun saque de falta que nun se contaba con que fuere directu. La capacidá de reacción del Sporting desfízose cola espulsión nel 77 de Christian Díaz. El 3-1 nel 84 d'Olivera y el 4-1 definitivu de Pulpo nel descuentu foron el remache a una tarde pa escaecer. L'equipu dio anuncia de que va recurrir la espulsión de Samuel