El Sporting pierde baxo l'orbayu

El Sporting acaba un primer vuelta tan tristaya como l'orbayu que cayó ayeri sobre'l Molinón. Con 27 puntos y perdiendo los dos últimos partíos, l'equipu de Marcelino queda a espenses d'un milagru pa postular a puestos d'ascensu na segunda vuelta, pa la que, polo menos, va vaciar la enfermería col retornu de Calandria. Sicasí, nel partíu d'ayeri la suerte nun se repartió equitativamente ente los dos bandos. Dos balones del equipu asturianu frayaron la madera de la portería alavesa, mientres que de los trés tiros a puerta del Alavés, dos entraron a gol directamente.

L'Alavés arrancó'l partíu demostrando la calidá que se-y supón a un equipu con ún de los presupuestos más altos de la categoría y con nomes como los de Rubén Navarro, Nené, Astudillo, Bodipo o la presencia nel puestu d'arrebatedor del ex - barcelonista Bonano. Asina, nel primer cuartu d'hora, anque con un xuegu un poco desordenáu, l'Alavés acorripió al Sporting buscando abrir un furacu. El primer avisu diolu Bodipo, pero'l gol diba llegar gracies al fallu d'Ángel Pérez. El central asturianu confundióse al dir a ceder un balón y Rubén Navarro aprovechó'l regalu pa marcar el primer gol de la tarde. Con munchu partíu per delantre, el Sporting nun se dio y salió a buscar la portería del rival, pero'l xuegu nun brillaba per nenguna de les dos partes, estragándose dambos equipos nun centru'l campu cada vegada más espesu mientres na delantera asturiana fallaba siempre l'últimu pase y tampoco nadie s'atrevía a tirar. Con too y con ello, el Sporting apertó y, col primer tiempu dando les boquiaes, una xugada embaruyada nel área punxo na bota d'Ismael el gol que metía otra vuelta al Sporting en partíu nel primer tiru ente los trés palos del equipu asturianu.

Pal segundu tiempu, l'equipu de Marcelino dio entrada a Samuel y Juan por Javi Fuego y Lago, ganando muncho en profundidá, sobremanera pela banda izquierda, anque foi la derecha, con Pablo Álvarez metiendo peligru constantemente, la qu'apurrió más balones al área. Sicasí, nin Ismael nin Arthuro pudieron aprovechar nengún de los centros que-yos apurrieron, mientres que Samuel estrelló una falta nel testeru de la portería de Bonano.

Pela so parte l'Alavés tenía un arma definitiva na contra, especialidá qu'aprovechó l'equipu de "Chuchi" Cos nuna xugada que llevó Nené a toa velocidá pela banda pa da-y a De Lucas, cómodamente asitiáu nel área, un balón col que marcar batiendo a Roberto a la media vuelta. Quedaben diez minutos mas el descuentu, y el Sporting quemó tolos recursos que-y quedaben, pero ensin orde nin tampoco suerte nun baruyu final que la entrada de Borreguero tampoco nun ayudó a iguar. Un remate d'Arthuro que pegó en poste foi l'últimu cartuchu d'un Sporting qu'agora mira más p'abaxo que p'arriba na tabla