El Sporting perdona y pierde de penalti

Dos equipos que gasten les mesmes táctiques y con un nivel técnicu y físicu asemeyáu yeren los que s'enfrentaben ayeri en campu catalán nun partíu pal que yera difícil facer pronósticos. El Nástic de Tarragona salió fuerte y intentó delles llegaes los primeros minutos, pero en pasando'l primer cuartu d'hora'l Sporting espurrió llinies y los dos Pablos, Lago pela banda izquierda y Álvarez pela derecha, entamaron a llevar balones contra la meta del equipu local. Arthuro y Ismael teníen la teórica misión de metelos dientro, pero diben ser los dos interiores del Sporting los que tuvieren les dos ocasiones más clares del equipu asturianu, que pudo marchar pal descansu con un dos a cero en marcador, pero mientres que Pablo Lago dio col balón en poste, el tiru de Pablo Álvarez, que s'esmució pente les pates de Juanjo Valencia, acabó sacándolu un defensa local de la mesma llinia de meta.

El segundu tiempu nun tuvo un nivel de calidá como se viere nel primeru, pero los dos equipos entamaron una llucha de desgaste físicu col xuegu mui trabáu en mediu del campu de la que diba salir ganador el Nástic, qu'aprovechó la picardía del veteranu Antoni Pinilla pa forzar el penalti claru de Sastre nuna xugada que nun representaba ocasión clara de gol. El mesmu Pinilla convertió la pena máxima y el partíu entró nunos diez minutos finales nos que'l Sporting apertó ensin xacíu mientres el Nástic zarraba atrás ensin consentir les llegaes de los asturianos hasta que l'árbitriu pitó'l final