El Sporting perdió na Rosaleda col Málaga B

El Sporting y el Málaga, que tienen les dos plantiyes de xugadores más moces de tola categoría, xugaron un partíu malu en que namás se vieron balonazos, pases llargos con errores na recepción, munches faltes, y un xuegu per alto nel que'l equipu andaluz superó al asturianu tol tiempu . Con merecer un empate a 0 vistu'l xuegu de los dos rivales, el Málaga B sacó petroleu na única ocasión que tuvo nos noventa minutos al sacar nel minutu 67 un corner duldosu que se convertió en gol per aciu d'Ador.

Ello vieno cuando'l Sporting yá se rellambía col puntu del empate, porque l'equipu andaluz xugaba a mediu gas dempués d'echar tola primer parte col delanteru Geijo, un refuerzu de luxu procedente del primer equipu que punxo munchu peligru nel área del Sporting. Por suerte, si daqué tien l'equipu asturianu ye una defensa trabada que ye mui difícil de valtar nun siendo a balón paráu, como foi'l casu ayeri.

El Sporting perdió ayeri una racha de cuatro partíos ensin recibir un gol, pero lleva yá trés selmanes ensin marcar, una falta de remate preocupante.

Col Málaga B, los asturianos namás pegaron trés tiros a puerta (ún dientro y dos fuera) y nun sacaron un corner en tol partíu. Ente les razones pa ello ta la baxa de Calandria, el meyor delanteru que tien Marcelino, pero les igües que busca'l mister del Sporting a la baxa del arxentinu nun faen más que poner les coses peor. Ayeri sacrificó a Pablo Álvarez, el meyor interior del equipu y ún de los meyores xugadores de segunda, pa ponelu de delanteru, una posición na que'l "galleguín" nun s'afaya.

Acabante'l partíu Marcelino García reconoció que nun sabía si podía llamase fútbol lo qu'acababen de facer Sporting y Málaga B. Marcelino criticó'l llabor del refri, y reconoció que'l Málaga foi más agresivu y fizo más pol trunfu.