El Sporting nun ye a pasar la muria del Recreativo

Con un ambiente de primera división n'El Molinón, el Sporting de Xixón estrellóse una vegada tres d'otra na muria defensiva del Recreativo de Huelva, que llegaba a Xixón cola etiqueta de víctima propiciatoria. Los de Marcelino firmaron un primer tiempu pa escaecer y esconsoñaron nel segundu, teniendo delles ocasiones de gol clarísimes que'l meta y la defensa andaluces rebatiaron siempre nel últimu momentu. Un disparu floxu de Miguel foi'l primer avisu claru, y una falta de Bilic que sacó'l meta andaluz cuando se-y colaba pela escuadra volvió a demostrar la superioridá d'un Sporting que lo intentó hasta l'últimu momentu con ocasiones de Pablo Álvarez, Rubén y Dani Borreguero. Con too y con ello, el Recre pudo marcar nun fallu de la defensa local, pero Molina echóla alta. Sicasí, la derrota del Levante énte'l Numancia dio-y al Sporting otru puntu de ventaya nel lideratu, nel que yá tien una cuenta de 4 de diferencia.