El Sporting nun va poder fichar esta temporada

Les úniques incorporaciones, con restricciones.

Los peores prexasos cumpliéronse y el Sporting nun va poder fichar esta temporada. La única manera que Nico Rodríguez, el direutor deportivu nuevu del club, y Abelardo van poder apuntalar la plantiya del ascensu va ser, al igual que l'añu pasáu, con refuerzos del filial. Sicasí, según les informaciones de dellos medios especializaos, nesta ocasión los roxiblancos tamién podríen incorporar futbolistes pol salariu mínimu establecíu por conveníu en Primera, esto ye, 129.000 euros, o coles perres que se lliberaríen con trespasos o baxes. Nesti casu, podríen destinar a fichaxes un 25 por cientu de cada ficha lliberada.

La razón de que'l Sporting llegue a esta situación ye l'impagu de les fiches adeudaes de la temporada pasada. L'abonu, fuera de plazu, d'estes cantidaes nun sirvió pa retirar una sanción que los responsables del club sabíen que podía llegar. Ayeri, el Comité de Control Económicu de la LFP decidió siguir alantre con un castigu que tamién afeuta a Osasuna, equipu de Segunda División. Sicasí, estes decisiones son recurribles.