El Sporting nun se da

El Molinón llenóse per primer ocasión dende que'l Sporting cayere a segunda división y l'afición llevó en cuellu al equipu hasta un trunfu pela mínima que val pa caltener toles opciones d'ascensu énte un Poli Ejido que vieno a Xixón cola conseña de nun dexar xugar y aguantar l'empate a cero.

El primer tiempu foi una auténtica aburrición, y too por culpa del equipu visitante, que se llantó n'El Molinón con 5 defenses y una llinia de 4 centrales. Con ello, en 45 minutos nun hebo más que dos llegaes al área por parte del Sporting. D'otra manera, lo que sí qu'hebo foi tensión que l'árbitrio cortó pela freba enseñando trés tarxetes marielles nel primer cuartu d'hora p'aselar los ánimos, pero los d'Almería veníen a otra cosa, y dedicáronse a cortar el xuegu sistemáticamente, echándo-y una bona pildorada de teatru a cada falta que recibíen y cometiendo bien d'elles pa francer el ritmu d'un partíu en que los de casa llevaben munchos más argumentos qu'ellos. Con too y con ello, l'Ejido tuvo una ocasión clara nun trallazu d'Agostinho qu'obligó a Roberto a facer una parada espectacular.

El segundu tiempu amenazó con ufiertar más de lo mesmo y hasta con menos calidá. Los balonazos llargos d'una portería a la otra baxaron el nivel los diez primeros minutos, pero entós el Sporting esconsoñó definitivamente. Ismael, Pablo Álvarez y Rubén, mui trabayador tola tarde pero afogáu pola altura de los defenses que lu marcaben, tuvieron ocasiones clarísimes. Foi entós que Marcelino metió en campu a Mate Bilic. El croata pue que-y falte la elegancia de los grandes delanteros, pero ye de los que garren les oportunidaes pel pescuezu, y namás llegar vio clara la oportunidá que supunxo'l gol del Sporting. D'ehí al final, el Sporting, que yá taba con tola artillería en xuegu, nun supo, o nun quixo, xugar a la defensiva, y l'Ejido tuvo nun tris de desarma-yos la bolera a los asturianos nuna contra que dexó a De Nigris solu énte Roberto. Menos mal que'l rebatiador del Sporting sabe cuando tien que salir a cortar un balón. Al final, un 1-0 que val pa caltener la tercer plaza de la tabla y esperar a que tolos rivales directos del Sporting s'enfrenten ente ellos nes selmanes que vienen.