El Sporting esconsoñó

Entamaba mal la cosa ayeri n'El Molinón pal equipu de Marcelino García. Neto que nel partíu col Salamanca, el rival adelantábase en marcador nos primeros minutos dexando la pelota en teyáu del Sporting pa ser a recuperase. El gol del Córdoba vieno con polémica, y los aficionaos del Sporting vieron falta al porteru na entrada d'Armentano sobre Roberto que supunxo'l gol del Córdoba nel minutu 4, ello por nun falar del orsay de trés futbolistes cordobesos na xugada del gol. L'escándalu que s'armó nes grades d'El Molinón tardó n'apagase, pero cuando lo fizo foi pol xuegu d'un Sporting que desesperaba a l a so afición. Desaniciáu del centru del campu y faltu de conexón ente llinies por culpa d'ausencies como la de Samuel, el Sporting echó tola primer parte como un coríu mareau pel campu, anque Pablo Álvarez tuvo la ocasión del empate cuando, nuna de les poques llegaes a puerta del equipu asturianu, pegó un trallazu dende'l puntu de penalti que'l rebatiador cordobés foi quien a atrapar. Borreguero punxo otra vuelta la emoción cuando tuvo nun tris d'empatar nel saque d'una falta directa, pero Jáuregui tocó lo xusto pa mandar el balón perriba de la portería.

Pal segundu tiempu, el Sporting salió colos cambeos xustos. Gerardo, criticadísimu pol públicu, quedó na caseta y salió por elli Omar, un rapaz del filial. Estratéxicamente, Pablo Álvarez, que-y tocare facer de punta desnortiáu na primer parte, movióse pa la banda derecha del ataque sportinguista. Ello y la recuperación de Borreguero, qu'anduviere perdíu tol primer tiempu, foi abondo pa que l'equipu diere un reblagu definitivu. Pablo Álvarez abrió'l xuegu del Sporting y entamó a apurrir balones peligrosísimos al área, poniendo la emoción qu'Ismael convertió en goles. Nel minutu 66, el delanteru más criticáu pola afición aprovechó un pase preciosu de Borreguero pa meter el del empate pel únicu furacu que dexó Jáuregui na so salida. Cola igualada en marcador, el Córdoba viose inferior y reculó pa intentar salvar el puntu, pero la retirada cordobesa dio-y entovía más fuerza al ataque asturianu. Pablo Álvarez mandó un tiru endemoniáu dende la so banda, y anque Jáuregui rebatió la trayectoria diagonal del balón, ellí taba Xuan pa marcar el 2-1 nel rebote. Ello llevó l'allegría definitiva al públicu, que diba convertise en llocura col tercer gol, el más guapu del partíu. El debutante Omar, que punxo detalles de categoría, mangóse delantre de Jáuregui, pero'l porteru del Córdoba, mui finu ayeri, rebatió la pelota. El balón llegó-y a Xuan, pero Jáuregui rebatióla otra vuelta. Ensin aturullase nin empixase cola pelota, Xuan dexó-y la pelota a Ismael, que-y llegaba pela izquierda, remachando'l delanteru navarru'l terceru pal Sporting nuna gran tarde de fútbol.