El Sporting dexa la ilusión en Valladolid

El Sporting precisaba del trunfu en Valladolid pa siguir agarrándose a les sos curties posibilidaes d'ascensu, pero l'equipu de Marcelino, como vien faciendo a lo llargo de tola segunda vuelta, demostró que nun ye a cuayar fuera de El Molinón el bon xuegu que fai en casa.El mesmu equipu que la otra selmana s'impunxere al Elche, otru de los gallos na llucha pol ascesu, foi tol tiempu a remolque de los locales, que tan pasando per una fase de gracia dempués de cambiar d'entrenador. El Valladolid salió más fuerte que'l Sporting, pero con too y con ello, l'alcuentru decidióse nuna xugada nel minutu 14 cuando Óscar Sánchez convertió en gol un centru de Jairo Castillo. Lo que yá yera una desventaya pal Sporting convertióse nun problema mayor al espulsar l'árbitrio all sportinguista Cristian Díaz por protestar la xugada, na que reclamaba orsay del delanteru pucelanu. Con diez y perdiendo, el Sporting llevó otru mazazu, esti definitivu, en namás cuatro minutos, los que precisó'l Valladolid pa marcar el segundu per aciu de Diego Figueredo, que s'anticipó al porteru asturianu Roberto nun fallu d'esti.

El Sporting, apoyáu ensin reserva por parte de los sos seguidores, intentó controlarel partíu na segunda parte, pero anque los de Marcelino llevaron el pesu del xuegu nos 45 minutos últimos, faltó-yos siempre la definición nel últimu pase. Les ocasiones más clares pal Sporting foron una de Calandria col primer tiempu dando les boquiaes. Tamién col tiempu escosando, pero nel segundu tiempu, los asturianos pidieron penalti del arrebatedor del Valladolid, Albano Bizarri, sobre Ismael.