El Sporting destitúi a Manolo tres la imaxe mala del equipu en Copa y Sandoval pasa a ocupar el bancu

Manuel Sánchez Murias ‘Manolo’ dexó esti xueves de ser entrenador del Sporting. La imaxe mala del equipu nel partíu de Copa contra’l Mirandés, pese al trunfu final (2-1), llevó al conseyu d’alministración a sustituyilu por José R. Sandoval.

Na páxina oficial de la entidá se confirma que’l Sporting da esti pasu “con un pesar profundu” pol “dolor de tener que prescindir d’un profesional que ye exemplu de trabayu, honestidá y implicación, aspeutos que desendolcó como futbolista y que tovía llogró aumentar muncho más como entrenador. Por esti motivu cuesta tanto tomar esta decisión que s’entiende necesaria dafechu dada la situación deportiva del primer equipu”. Manolo tomó les riendes del Sporting tres el descensu de la temporada pasada, campaña na que dirixó al filial con un llabor de méritu. La planificación mala de la plantiya, fecha por Raúl Lozano y él mesmu, y los 8 de 27 puntos posibles que suma l’equipu en Lliga punxeron al xixonés contra les cuerdes. La remontada en Copa frente al Mirandés nun ayudó a Manolo a mantener el puestu, yá que’l mal xuegu del Sporting llevó a los 7.000 aficionaos presentes n’El Molinón a amosar la so disconformidá pola situación pese a la clasificación pa dieciseisavos de final, onde espera Osasuna.

José Ramón Sandoval va sustituyir al xixonés nel bancu del Sporting. El d’Humanes, de 44 años, consiguió mantener al Rayo Vallecano en Primera la temporada pasada con una plantiya de perfil baxu tres algamar l’ascensu nuna situación más que complicada, colos xugadores bona parte de la temporada ensin cobrar. Pese a la so bona trayeutoria col equipu madrilanu, nun renovó col club de Vallevas por motivos económicos. Enantes namái tuvo esperiencia col filial del Getafe y del Rayo, y con equipos menores de la Comunidad de Madrid.