El Sporting despidióse dando mala imaxe

Énte un Molinón cola entrada más baxa de la temporada y estráu de pancartes nes que se pidía al máximu accionista de la entidá José Fernández qu'abandonare l'equipu, el sporting dexóse llevar énte'l Nástic nun partíu llamentable nel que los errores del porteru Rafa permitieron los trés goles del equipu catalán.

El Sporting, que'l llunes va pasar a tar baxo la tutela del xuez, despidióse de la xente de casa de la peor manera. Anque los de Marcelino aguantaron el tipu'l primer tiempu, con dalguna xugada curiosa obra casi siempre de Juan, namás entamar el segundu tiempu'l Nástic entamó una xugada que dexó a Diego torres sólu énte Rafa. El segundu arrebatedor de la plantiya del Sporting tiró al delanteru al suelu, col inevitable penalty anque cola gracia arbitral, que-y perdonó la espulsión. Otru error de Rafa, que s'adelantó demasiao nuna salida, dexó la ocasión planchada pa Diego Torres, que picó per alto'l balón consiguiendo'l 0-2 y llevantando l'enfadu de l'afición. El 0-3 definitivu, obra de Bolo, llego nun tracamundiu de defensa y porteru, y entovía pudo haber uin 0-4 nuna xugada de Cuellar. El Sporting tuvo ocasión de marcar el de la vergoña pero'l tiru d'Arthuro dio nel testeru de la portería.