El Sporting defraudó na estrena del campeonatu

El Sporting cayó ayeri n'El Molinón a balón paráu, pero la derrota pola mínima nun espeya la inferioridá nel campu d'un Sporting que se dio bien pronto contra un Recreativo de Huelva muncho más centráu. Entamando pela parte d'atrás, la defensa acusa la falta de Yago, al que la directiva intenta repescar pa esti añu. Mientres, l'acabante de llegar Neru nun ta acopláu al conxuntu y Jeffrey carez d'una agresividá que los árbitrios nun perdonen: ayeri forzó la segunda mariella nun agarrón nel centru'l campu. Dorado ye la referencia d'una defensa falta de rodaxe, mientres que nes llinies de delantre faltó entendimientu y profundidá nel pase y sobró tráficu pesáu peles carriles, dexando solu a un Calandria trabayador pero que nun tien la presencia física de Mate Bilic pa forzar la falta del rival.

Too foi asina que'l Sporting cásique nun tiró a la portería andaluza en tol partíu, mientres que n'asturiana Roberto trabayó a destayu p'atayar tolo que-y llegaba, contando dacuando cola ayuda de la madera pa rebatiar la pelota.

El llabor del Recreativo alcontró premiu a balón paráu, como tantes vegaes cayere'l Sporting na campaña 2003-2004. Ángel Rodríguez tiró una falta de llibru y la defensa vendió a Roberto al abrise dexando'l güecu xustu pa que la pelota entrare au nun llegaba'l porteru del equipu asturianu. La entrada de Pablo Álvarez y de David Lago meyoró un poco la imaxe del Sporting, pero tampoco nun esborrió la imaxe d'un partíu nel que l'equipu de casa demostró que-y queda muncho por afinar.

Lo único que nun-y falló al Sporting foi l'afición. La entidá declaró 13.000 socios, munchos más que los 9.800 que tenía al entamar la campaña anterior, y foron más de 14.000 persones les qu'asistieron al partíu d'ayeri.