El Sporting de Xixón pieslla'l 2006 en puestu d'ascensu

El Sporting de Xixón ganó ayeri al equipu de Las Palmas pol resultáu de dos goles a cero en el Molinón. Con esti resultáu, l'equipu de Manolo Preciado acaba l'añu con 31 puntos nel so caxellu y asítiase na tercer plaza de la lliga, en puestu d'ascensu a primera,anque empatáu a puntos col segundu y cuartu clasificaos.

Con ser televisáu y facese en dia de trabayu, el partíu convocó a más de 12.000 espectadores al Molinón, un númberu que diz muncho de les espectatives que crea n'afición l'equipu d'esti añu, que, gracies a fichaxes como Barral, Congo y Diego Castro, ta faciendo un xuegu de lo meyor que se vio en tiempu pel Molinón. Con too y con ello, el gol y el futbol prestosi tardaron en llegar, y ello foi que Las Palmas llantóse en campu con un equipu llimitáu pero bien asitiáu y qu'aguantó con munchu oficiu l'ataque del Sporting nos primeros 45 minutos, que foron poco vistosos sacantes un remate de Javi Fuego que pasó allegáu a los palos. Na segunda parte, el Sporting llegó con más claridá, afogando a un equipu canariu que se desfizo en recibiendo'l primer gol, obra de Barral, que foi a meter ente los trés palos un balón pal que cuasimente nun tenía descuellu dempués de regatiar a dos defenses. El Sporting fizo los sos meyores minutos, entrando constantemente nel área canaria. Diez minutos dempués, el porteru de Las Palmas, Pindado, arrebatía un centru de Javi Fuego, pero'l rechace favoreció a Diego Castro, que marcó'l 2-0 definitivu.