El Sporting da un reblagu na clasificación

El Sporting de Xixón dio un reblagu na clasificación al ganar ayeri por 2 goles a cero al Alavés nel estadiu d'El Molinón tres de les derrotes de los sos principales rivales na llucha pol ascensu. Los de Marcelino namás se dexaron dominar pol Alavés el primer cuartu d'hora, pero'l gol de Christian Díaz al rematar de cabeza un corner entornó la contienda definitivamente al favor de los de casa, qu'otra vegada más tuvieron nel públicu d'El Molinón al xugador númberu 12. Con ser el partíu televisáu y con xugase de mañana, l'estadiu rexistró una entrada de más de 18.000 espectadores, la mayor en segunda división esti añu.

Nel segundu tiempu'l Sporting acabó de desfacer a un rival que nun se metió pelos dominios de Roberto, anque'l rebatiador asturianu tuvo que demostrar delles vegaes la so calidá saliendo a atayar con muncha seguranza un par de xugaes nes que l'Alavés foi a valtiar la pesllera asturiana. "Pena que ye cedíu" dicíen munchos aficionaos.

Sicasí, el gol de la tranquilidá tardó en llegar. Anque Pablo Álvarez desfizo la defensa vasca y demostró bien d'ocasiones la so calidá de xuegu y control que tien del balón, nin elli nin el croata Mate Bilic foron a marcar. Entós, a diez minutos del final, Marcelino retiró al balcánicu y dio-y entrada a Rubén. El delanteru de la cantera fizo una internada pel llateral de la meta alavesa y, cásique ensin ángulu pa dar descuellu, foi a echa-y un pase perfechu a Pablo Álvarez, que se desfizo de trés defenses alavesistes que veníen a ataya-y el pasu, marcando a placer. Foi'l dos a cero y el deliriu nel Molinón.