El Sporting cesa a Tomás y pon el filial en manes d'Isma de manera provisional

|

Los roxiblancos ocupen puestu de promoción, cola salvación a dos puntos.

Tomás Hervás garró les riendes del Sporting B la temporada pasada –tres terminar la temporada'l cursu anterior al xubir Abelardo al primer equipu tres la destitución de Sandoval–, consiguiendo la salvación d'un equipu desmanteláu pola imposibilidá de fichar del primer equipu, lo que llevó a xubir a una bona cantidá de xugadores que, en circunstancies normales, siguiríen cola so progresión nel filial. Tres un aniciu irrregular, una gran segunda vuelta posibilitó la salvación de la categoría.

Esti añu, con una política de fichaxes discutible, el conxuntu xixonés tuvo un bon arranque de temporada, anque una acumulación de malos resultaos colocó a los xixoneses na zona baxa de la clasificación, d'ónde nun foron quienes a salir. Dende'l Sporting llamenten "tener que tomar esta decisión, dada la so profesionalidá y entrega", pero entiéndela "necesaria por mor de los resultaos deportivos, col ánimu de poder enderezalos y alloñar asina'l riesgu de descensu nel que ta l'equipu".

Ismael Piñera, segundu entrenador, va ocupar el bancu "provisionalmente" cuando falten seis xornaes de Lliga.

Dos derrotes siguíes en Mareo

El cese de Tomás vien tres enganchar dos derrotes consecutives como llocal, énte l'Izarra (2-6), nun partíu con una actuación arbitral polémica que llevó al Sporting B a acabar el choque con nueve xugadores, y contra'l Celta B (0-2), rival qu'agora marca la permanencia en Segunda División B. Los roxiblancos ocupen el decimosestu puestu con 34 puntos, ún menos que'l Celta B, que tien ganada la diferencia particular de goles. Mentes, el descensu ta en 33 puntos, los que tien l'Atlético Astorga.

El Sporting B afronta'l domingu un choque complicáu en Pasarón contra'l Pontevedra (17 hores), quintu clasificáu a nueve puntos de los puestos de play-off, posición qu'ocupa la UD Logroñés.

Contador Estadistiques