El Sporting cede un puntu en casa

Nun partíu ensin historia, el Sporting de Xixón cedió l'empate énte'l Tenerife depués d'adelantase con un gol de Juan. El de Prevera tuvo ocasión pa marcar otru gol de restallu, pero foi'l Tenerife'l que punxo la igualada en marcador.

El Sporting mandó nel primer tiempu, nel que'l Tenerife tuvo que xugar a la contra. El gol llegó bien pronto, nel minutu 12. Calandria dio-y un pase a Ismael que centró pa Juan. Solu nel segundu palu, el de Prevera remachó a placer. El sporting dominaba, pero nel minutu 23 Cristo pegó un tiru dende la raya del área al que nun pudo llegar Roberto, poniendo la igualada en marcador. El partíu entró col empate nuna fase ensin sustancia que diba continuase nel segundu tiempu. Pa desgracia del Sporting, Calandria vio nel 67 una tarxeta encarnada rigurosísima qu'obligó al equipu asturianu a xugar al tran-tran hasta llegar al minutu noventa. Con too y con ello, en tol segundu tiempu los porteros cásique nun tuvieron trabayu, y namás Roberto tuvo qu'atayar un mano a mano con Vitolo.

Sporting y Tenerife, empataos na tabla, sumen un puntu más p'asegurar la permanencia nuna temporada na que yá nun tienen nada polo que lluchar. El públicu d'El Molinón paez consciente d'ello, y asina foi qu'esti sábadu notóse yá un baxón grande n'asistencia al estadiu del conceyu de Xixón. El Sporting tien de centrase más nos sos problemes económicos que na situación deportiva, y ye qu'enantes de qu'acabe esti mes la entidá tien de resolver bien de pagos y atrasos a la so plantiya y emplegaos.