El Sporting cayó en dos minutos na copa'l Rei

El Sporting de Xixón perdió un partíu que tenía ganáu en dos minutos desastrosos. La entrada de Moisés dio un reblagu al xuegu del Elche, qu'aslcontró na banda izquierda del Sporting un furacu pel qu'entraron, en namás dos minutos, los goles de Rubén y del mesmu Moisés.

Sporting y Elche xugaron ayeri la eliminatoria a un solu partíu de la copa'l Rei. Los entrenadores de los dos equipos, más preocupaos pola liga, guardaron a munchos xugadores, anque nel casu del Sporting les más de les baxes foron por mancadures que por decisión de Marcelino, que fizo debutar a Rafa, el porteru suplente, y dio-y la oportunidá saliendo de titular a Omar, el nuevu delanteru salíu de la cantera del filial. Los dos xugadores rindieron a bon nivel, lo mesmo que l'equipu, pero llamentablemente'l resultáu nun acompañó.

Dambos equipos repartiéronse les oportunidaes nel primer tiempu, nel que los asturianos paecíen un poco varaos y faltos de soltura, pero Rafa tuvo que sacar lo meyor que lleva dientro pa cortar un disparu de Rubén y otru de Nino que guapamente pudieron adelantar al Elche, qu'alcontró güecos pelos qu'esmucise, sobremanera pela banda de Diego Alegre. Sicasí, el Sporting tuvo una ocasión mui clara nun gran trallazu d'Omar, que tuvo mui revolvín los 90 minutos de partíu y que demostró muncha elegancia col balón, anque nun alcontró munches ocasiones de pasar a la defensa ilicitana. Acabando'l primer tiempu, el recuperáu Ángel Pérez tuvo la mala suerte de mancase na boca nun güelpe nel área.

Nel segundu tiempu, Marcelino punxo a Jeffrey pol lesionáu Pérez y fizo un cambéu estratéxicu sacando a Pablo Lago por David Bauzá y pasando a Juan pal medio. El resultáu foi mui bonu, y, en pocu tiempu, el Sporting taba acorripiando nel área al Elche, un trabayu que frutió na gran xugada de Pablo lago que remató col gol d'Ismael. El Sporting ganaba 1-0 y podía aselar el partíu. En cuenta d'ello, Marcelino sacó a Pablo Álvarez pa da-y más velocidá al bloque a la contra y intentar el 2-0, pero la salida del xugador gallegu quedó inédita, porque xusto nel intre en qu'entraba al campu, el ex - sportinguista Rubén aprovechó un fallu bobu de Neru pa marchar col balón y mandar un trallazu a la portería del Sporting. Rafa nun pudo facer más que mirar pa la pelota entrando na rede. El Sporting amorió y un segundu fallu defensivu, esti de Jeffrey, punxo nes botes de Nino'l centru que remató de cabeza Moisés pa facer el 1-2. L'Elche corrió a guardase a tras pa defender el resultáu y el Sporting, desnortiáu dafechu, pasó los últimos venti minutos estrapallándose ensin orde contra la defensa del equipu visitante.