El Sporting B salva la dificultá de Loinaz y torna a Mareo cola eliminatoria de cara

El calor, qu'obligó a hospitalizar a Isma Cerro, l'estáu del terrenu de xuegu y l'arbitraxe nun impidieron que los xixoneses algamaran un bon empate a dos goles col Beasain.

Empezaron bien les coses pa los de José Alberto López, yá que nel minutu 2 adelantábense nel marcador con un gol de Rubén tres un córner. Sicasí, nun tardaría n'empatar el Beasain, gracies a una xugada individual de Claver, que nel 5 superaba a Dani Martín.

La temperatura alta, superior a los 30 graos, afeutó al xuegu de los xugadores de los dos equipos. Inclusive, enantes del descansu, Isma Cerro tuvo que ser sustituyíu tres un golpe de calor que recomendó la so hospitalización, pasando la nueche n'Euskadi.

Otra mala noticia pal Sporting B foi la señalización nel tiempu añadíu d'un penalti inventáu pol colexáu navarru Igor Garcés Bargada que materializó Jon Ander. Pese a esti revés, los roxiblancos foron a pola igualada y consiguieron empatar el choque nel minutu 50, con dalgo de fortuna, al desviar Jonma a la so propia portería un balón ensin peligru de Carlos Cordero.

Esti tantu afeutó al Beasain, que volvería a metese nel partíu por una espulsión rigurosa por doble mariella de Víctor Ruiz cuando faltaben 21 minutos pal final. El Sporting B metióse atrás a defender el resultáu, pero los llocales namái xeneraben peligru a pelotazos y el marcador nun se movería, en gran parte gracies al aciertu de Dani Martín baxo los palos.

Domingu de tarde, la vuelta

El domingu, a les 18.30 hores, va disputase en Mareo'l partíu decisivu de la eliminatoria definitiva pol ascensu a Segunda División B. José Alberto pierde pa dichu choque a Víctor Ruiz y ta pendiente de la evolución d'Isma Cerro, que yá ta de vuelta en Xixón.