El Sporting arranca un puntu en Huelva

El Sporting tuvo dos partes bien distintes n'El Colombino, estadiu onde lleva 28 años ensin perder. Ayeri, los de Marcelino nun faltaron a la tradición, pero'l premiu foi curtiu en viendo los méritos del equipu, que fizo un bon primer tiempu, con un xuegu de calidá y echáu p'alantre qu'emponderó'l mesmu entrenador del Recreativo, Quique Hernández. Con too y con ello, yera preciso abrir la pesllera del "Recre" l'equipu que menos goles lleva recibíos esta temporada con diferencia y l'unicu que xuega cuando ye preciso con llinia de cinco atrás. David Bauzá y dempués Ismael, qu'obligó a espurrise al arrebatedor local, punxeron les primeres ocasiones clares de gol, pero hubo d'esperar a un saque de corner pa qu'el brasileñu Arthuro ficiere valer la so estatura, picardía y saber asitiase nel área, rematando a gol cola cabeza. Yera'l minutu 36 y el Sporting marchaba pal descansu con una bona ventaya, sobremanera sabiendo lo difícil que ye marcá-y al equipu andaluz, pero'l segundu tiempu diba tener un desarrollu bien distintu.

Quique Hernández dio-yos entrada a Azkorra y Benítez y mandó-y al equipu salir revolucionáu, ganándo-y metros a un Sporting que diba engurriando y nel 53 Merino remató tamién de cabeza, un unviu de Benítez, poniendo l'empate en marcador. El Sporting buscó entós el recursu de salir a la contra, y nel 67 Ismael vio puerta nel rebote d'un tiru d'Arthuro, pero l'árbitriu interpretó qu'hubiere primero falta na xugada. El Sporting diba perder toles sos opciones al echar l'árbitriu a Pablo Álvarez, que marchaba pa la caseta con dos marielles. Ensin únde los sos futbolistes más decisivos, l'equipu asturianu perdió fuelgu, mientres qu'el Recreativo tampoco nun pudo allegase con peligru a la meta de Roberto, firmándose un definitivu repartu de puntos que dexa a los asturianos a cinco puntos de la zona de descensu. A destacar el retornu de Calandria dempués de meses de lesión. L'arxentinu namás tuvo diez minutos a lo último del partíu, pero vióse-y traza.