El Sporting agárrase al suañu del ascensu

Recuperando a bien de los titulares que nun pudieren xugar va ocho díes contra'l Tenerife por baxes y por sanciones, el Sporting xugaba ayeri la primera de les trés finales que-y quedaben al equipu asturianu pa poder xubir a primera. Obligáu a ganar polos resultaos de los rivales directos, el Sporting demostró yá de mano ser mui superior a un Cádiz veníu a menos a lo llargo de la temporada, pero como siempre, la falta de calidá d'un bloque que ta na tabla mui penriba de lo que-y correspuende acusóse a la hora de resolver. Depués de media hora de xuegu yera evidente que nadie nun diba ser capaz nel Sporting de despesllar el candáu andaluz. El desapaecíu Bilic y Rubén, que tuvo mui trabayador, diben caún pel so llau ensin coordinación nenguna. Asina foi que'l meyor del Sporting na tarde d'ayeri, Pablo Álvarez, vio la oportunidá clara bombiando dende fuera del área un balón que se metía na rede gaditana.

Asina marchóse pal descansu col 1-0 en marcador, un resultáu positivu pero que facía que la dulda se posare nos más de 25.000 aficionaos qu'ayeri enllenaron el Molinón. El desarrollu del segundu tiempu fizo bones les duldes, col Cádiz espurriendo cada vegada más les llinies y metiendo nel so campu a un Sporting medranosu al que yá nun-y salía bien un pase y que los cambeos acabaron d'estropiar, sobremanera cola entrada de Diego Alegre por Juan. La situación llegó a un puntu que yá nun tenía torna cuando Samuel ganó la segunda mariella nuna entrada a Babangida. Con diez, cola banda de Diego Alegre barrida y col Cádiz bombiando balones sobre la portería de Roberto, too apuntaba al empate y hasta la derrota, pero entós salió otra vegada la gana d'un pablo Álvarez que valió por tol equipu. Pablo, que pocos minutos enantes andaba coxicando por una mala cayida, recuperóse y echó una galgada a la contra'l solu pela banda, poniéndo-yla a güevu a Dani Borreguero pa rematar. La suerte tuvo col Sporting, y el balón dio nel únicu defensa gaditanu lo xusto pa empixar al porteru, que nada nun pudo facer pa torgar el 2-0 definitivu.

El trunfu val-yos a los asturianos pa siguir quintos a trés puntos de les places d'ascensu, anque yá namás queden dos xornaes pa rematar el campeonatu. Xunta Pablo Álvarez, hai que destacar nel partíu d'ayeri'l bon llabor de Dorado y de Yago, qu'esborrió del campu a Oli, na defensa, y tamién el papel de Dani Borreguero y el de Bauzá.