El Sporting achapló al Albacete na estrena del campeonatu

El primer Sporting de la temporada 2005-2006 salió al campu del Molinón a desfacer toles duldes que pudieren existir sobre l'equipu énte una afición falta de trunfos y poco enfotada nel conxuntu tres de los munchos problemes que se vivieron esti branu no económico. Les entraes d'Enguix y Juanmi aportaron munchu posu a un equipu meyor puestu en campu que l'Albacete en tola primer parte y que xugó dende l'entamu a apertar al rival, creando munches ocasiones de peligru. Un peligru que en menos de diez minutios tresformose en gol gracies a un claru penalti sobre Calandria que tresformó Pablo Álvarez, auténticu héroe de la tarde. Col Sporting afogando al Albacete, que nun yera más qu'a xugar a la contra en balones llargos, nel minutu 25 llegó'l segundu, obra tamién de Pablo Álvarez al rematar de cabeza al segundu palu'l rebote d'un corner que-y punxo Juan a la midida.


Tres del descansu, l'equipu de Ciriaco Cano tuvo dos ocasiones clares más, con dos remates al testeru de la portería obra de Calandria y Pablo Álvarez, pero l'Albacete, que tenía que demostrar que tien equipu pa postular al ascensu, con xente como Parri, Aranda o David Pirri, espurrió llinies y entamó a telegrafiá-y balones a Aranda, que fizo valer la so superioridá física pa llegar en solitario en delles ocasiones énte Roberto. L'arrebatedor del Sporting nun se dio y llegó a pará-y cuatro tiros siguíos a la delantera del Albacete en medio de la ovación de la grada, mientres que'l quesu mecánicu namás foi a marcar un gol anuláu por orsay. L'altísimu ritmu del partíu pesó nos últimos minutos, aselando dalgo'l ritmu, que non la emoción, hasta llegar a un resultáu final que-y da fuelgu a l'afición y al mesmu equipu. L'Albacete marchó pa casa con media docena de tarxetes marielles.