El Sporting acelera la incorporación de xugadores

Tres los fichaxes de Víctor Rodríguez y Mariño, anunció esti martes el de Lillo y ta próximu a zarrar los de Burgui y Moi Gómez.

A falta de seis día pal comienzu de la pretemporada y con una plantiya compuesta por 15 xugadores, más los trés que xuben del filial por contratu, esto ye, Juan Mera, Álvaro Bustos y Julio, el Sporting pegó un acelerón esta xornada pa dar efeutivos a Abelardo pa empezar a trabayar. Tres los fichaxes yá anuncios de Víctor Rodríguez, presentáu ayeri en Mareo, y del guardameta Diego Mariño, que va vestise mañana a les 11.30 hores nes instalaciones roxiblanques, van xugar la temporada próxima nel Sporting Burgui, Moi Gómez y Lillo.

Burgui, estremu izquierdu y media punta del Real Madrid de 22 años, llegaría en calidá de cedíu per una temporada tres disputar l'anterior nel Espanoyl. Nel conxuntu perico nun tuvo un bon añu nel so debú en Primera, disputando 26 partíos, 8 d'ellos de titular, y anotando un gol, precisamente n'El Molinón. Pese a ello, trátase d'un xugador con bona téunica y con capacidá de meyora que llegó a xugar na seleición sub-20.

Yá en propiedá per cuatro temporaes, y pendiente de la confirmación por parte del Sporting tres llegar el club xixonés a un alcuerdu col futbolista y el Villarreal, llegará Moi Gómez. El talentosu centrocampista, internacional sub-21, nun tuvo tampoco un bon añu nel Getafe, onde tuvo cedíu la pasada temporada. Disputó 22 alcuentros, 9 d'ellos de titular, anotando 2 goles. Sicasí, Gómez, tamién de 22 años, dexó nel club castellonense bones sensaciones en temporaes pasaes.

Completa les incorporaciones el llateral derechu Lillo, de 27 años que firmó pol Sporting per trés temporaes. L'alicantín de la cantera del Valencia, col que llegó a xugar un partíu en Primera, foi internacional sub-21, campeón de los Xuegos Olímpicos del Mediterraneu 2009 con España y pasó pel Murcia, el filial del Almería –llegando a xugar dos partíos nel primer equipu– y Alcoyano enantes de recalar nel Eibar y ser partícipe del históricu ascensu a Primera del equipu armero. Foi titular nos dos primeros años, anque una lesión na pasada temporada impidió-y ganar la confianza de Mendilibar. Precisamente esti motivu ye'l que lu lleva a salir d'Eibar, onde tenía contratu, y recalar en Xixón pa competir pol puestu con Lora.