El Sporting abre la Lliga cola visita del Madrid

|

L'Uviéu debuta en casa col Lugo.

Nun van tener los homes d'Abelardo un aniciu fácil nel so retornu a Primera División. Los roxiblancos van abrir la Lliga la fin de selmana del 23 d'agostu n'El Molinón contra'l Real Madrid, partíu nel que los abonaos han de pagar 20 euros, según anunció'l club hai dos selmanes na prentación de la campaña de socios.

Tres una visita a Anoeta na segunda xornada, nel que s'espera'l primer desplazamientu masivu de la siempre viaxera afición roxiblanca, el Sporting va recibir al Valencia pa depués viaxar a A Coruña y a Vallecas. Cinco partíos, dos en casa y trés fuera, nos que ye importante sumar puntos pa principiar con una dinámica bona.

Los xixoneses van zarrar la Lliga n'El Molinón contra'l Villarreal depués de disputar un choque en Getafe que pue ser clave p'amarrar la permanencia, oxetivu del Sporting nesta campaña.

Calendariu de Segunda

Tampoco va tener un comienzu fácil l'Uviéu, con debut nel Tartiere énte un Lugo que medra añu a añu y que destaca pol so bon tratu del balón. Tres recibir la visita del equipu entrenáu dende esta temporada por Luis Milla, l'afición azul va protagonizar el primer gran desplazamientu del añu a Gasteiz, onde l'Uviéu va enfrentase al Alavés, otru equipu consolidáu en Segunda y en crecimientu.

L'Albacete va ser el rival na tercer xornada, pa depués viaxar a Tenerife y recibir al Girona. Otra manera, l'Uviéu va despidir la temporada nel Tartiere contra Osasuna depués de xugar en La Romareda col Zaragoza. El primer partíu del play-off ta previstu pal miércoles 8 de xunu.

Contador Estadistiques