El SOMA, ¿antiglobalización?

La organización sindical más poderosa del país ta acabante de cambiar dafechu la so web, qu'agora ufierta un diseñu nuevu en flash. Cambia la presentación, pero non l'imaxinariu, y ye que los diseñadores nun tovieron más ocurrencia qu'usar de fondu'l famosu cuadru "El cuartu Estáu" de Giuseppe Pelizza da Volpedo, el mesmu cuadru que Bertolucci emplegare pal cartel de Novecento y una de les imáxenes más recurrentes de la izquierda. Nun se sabe si'l sindicatu tuvo que pagar derechos pola obra, pero d'otra parte paez que'l SOMA, que va pa cien años d'esistencia, va adaptándose a los nuevos tiempos. La selmana pasada, el so líder José Ángel Fernández Villa anunció que nun taba d'alcuerdu cola propuesta de la SEPI pa Hunosa (pesllar dellos pozos, recortar plantilla y liquidar los economatos mineros) . Los mensaxes, lo mesmo'l de la Sepi que'l del Soma nun son nuevos, pero sí que lo ye la reivindicación que propón el sindicatu mineru.Ello ye que Villa alvirtió que si la Sepi nun rectificaba, el Soma podía armala nel conceyu que va facer l'Ecofin n'Uviéu. Cuando Uviéu yá taba dientro d'un plan especial de seguranza énte la posibilidá de que grupos antiglobalización radicalizaos tomaren la ciudá, la hipotética presencia de manifestantes del SOMA xunta los grupos antiglobalización de xuro que nun va a aselar l'enfotu vixilante de la Delegación del Gobiernu.

Contador Estadistiques