El software llibre, preséu pal catalán

La conceyalía de la Ciudá del Conocimientu del Ayuntamientu de Barcelona y el TecnoCampus de Mataró presentaron ayeri la plataforma CATix, el primer paquete informáticu de software llibre y de baldre dafechu n'idioma catalán, creáu pol profesor Antonio Mirabete.

CATix, qu'inclúi un sistema operativu y un total de 1.200 aplicaciones d'usu llibre, nun precisa d'una instalación abegosa, en cuantes que carga ello solo al prender un autoarranque nel CD-Rom en que se presenta. Pa más aquello, como los más de los virus informáticos tan pensaos pa dañar a sistemes Windows, CATix ye inmune a astaques. Otra característica interesante ye que'l sistema reconoz periféricos compatibles nuevos ensin falta de drivers

Técnicamente'l CATix encóntase nun sistema operativu que parte de la distribución Biadix, versión catalana de la internacional Knoppix, aplicando navegadores Mozilla (el mesmu que tien versión disponible n'asturianu) y Konqueror 3.2.2, un programa de mensaxería instantáneo tipu messenger y el paquete ofimáticu Open Office, arriendes d'otres aplicaciones multimedia. Como ser ye de baldre, la distribución va facese al traviés del periódicu en catalán "Avuí" que va repartir esti domingu 60.000 copies del CD.

La creación de Catix supón el primer emburrión institucional seriu a un llabor de creación de programes informáticos en catalán que lleva tiempu faciéndose en Cataluña.L'estoyu d'aplicaciones disponibles hasta agora pue vese na histórica web de Softcatalá