El sindicatu CSI-CSIF acusa a Areces y Valledor de retrasar les tresferencies de xusticia

El sindicatu CSI-CSIF emitió ayeri un comunicáu de prensa en que fai públicu'l so malcontentu por que, en febreru de 2006, entovía siga ensin facese la tresferencia de xusticia a la Comunidá autónoma Asturiana. El sindicatu diz que l'asunción de competencies por parte d'Asturies ta retrasándose muncho y acusa a "tolos políticos" d'entrar nun xuegu pa beneficiase d'ello.

El sindicatu acusa principalmente al presidente Álvarez Areces y al Conseyeru de Xusticia Javier Valledor, asitiándolos a dambos como responsables d'un procesu "que carez dafechu de tresparencia" y nel que "Areces xuega a ganá-y la partida a Valledor, que tamién demuestra que sabe trabayar los tiempos al favor de los sos intereses de partíu". CSI-CSIF albidra que les intenciones del conseyeru pasen por "rentabilizar electoralmente les tresferencies, de les que van dar la información que-yos interese cuando llegue'l momentu col correspondiente bombu".

Otramiente, el sindicatu afirma qu'Asturies ta esperando pola xestión de l'Alministración de Xusticia y los 40 millones d'euros precisos pa qu'esta s'asuma por Asturies y que s'anunciaren a últimos de payares. CSI-CSIF denuncia que d'entós p'acá van trés meses de "silenciu dafechu" y, anque reconoz que l'alministración asturiana yá anunciare que diba ser imposible facer efectiva la tresferencia enantes de navidá , opina que'l retrasu yá ye por demás.

El Gobiernu asturianu afirmare a mediaos del mes de xineru que la tresferencia taba paralizada dende'l Ministeriu d'Economía y que d'esti organismu yera del que dependía iguar dellos flecos del procesu.