El sierense Álvaro Álvarez Fernández llevóse’l XIII Concursu de Gaiteros y Gaiteres Mozos de Bimenes

Tres finar en segunda posición l’añu pasáu, Álvaro Álvarez Fernández consiguió llevase esti sábadu’l Concursu de Gaiteros y Gaiteres Mozos de Bimenes. Mentes, Fernando Vázquez Cárcaba repitió como tercer clasificáu.
 
El gaiteru sierense, de 17 años, pudo celebrar asina’l trunfu que raspió hai un añu. Nesta ocasión, la so actuación foi considerada pol xuráu formáu por José Ramón García Navia, José Luis García Díaz y Eugenio Otero Vega, como la meyor de los 13 participantes, lo que-y permitió llevase los 300 euros de premiu y el troféu que lu acredita como ganador de la decimotercer edición del concursu. El yerbatu Andrés Blanco Montes, de 15 años, terminó en segunda posición, mentes que’l tamién sierense Vázquez Cárcaba, de 18 años, tuvo que conformase con una meritoria tercera plaza. Éstos gaiteros lleváronse, amás d’un troféu, 200 y 100 euros de premiu, de manera respeutiva.
 
El XIII Concursu de Gaiteros y Gaiteres Mozos de Bimenes celebróse esti sábadu pasáu nel marcu de la Romería de la Oficialidá, continuidá de la Fiesta de la Oficialidá de la Llingua Asturiana que conmemora la declaración d’oficialidá nel conceyu –torgada llueu pol Tribunal Constitucional– nel Plenu del 5 de xunetu del 1997. Na entrega de premios a los trés meyores participantes, el Conceyu de Bimes aprovechó tamién p’apurrir un obsequiu a Álvaro García Suárez, gaiteru que ganó’l Premiu AMAS 2012. El músicu yerbatu tamién recibió un detalle del Grupu Folklóricu La Flor del Pumar, de Nava.