El seutor del automóvil va vivir una fuelga de siete díes nel mes d’abril

|

Los díes 14, 15, 18, 19, 20, 28 y 29 d'abril, el seutor asturianu de la venta y l'arreglu d'automóviles va dir a la fuelga. Los sindicatos MCA-UXT y la Federación d'Industria de CC OO son los convocantes d’esti paru.
 
Maximino García (CCOO) y Eduardo Donaire (MCA-UXT) señalaron que’l motivu de la fuelga ye’l “bloquéu” de les negociaciones del conveniu coleutivu del automóvil per parte de la patronal asturiana. Los sindicatos quéxense de que los empresarios nun quieren incluyir una cláusula de revisión salarial cuando tán aumentando los precios y, poro, los beneficios. En concreto, Donaire señaló que los empresarios del arreglu tán aplicando un 3 por cientu de xuba nes sos tarifes d’esti añu, mentes que se nieguen a xubir nin un céntimu d'euru'l salariu de los trabayadores. El conveniu afeuta a 122 empreses de venta de coches, qu’empleguen a 1.267 trabayadores, y 710 compañíes d'arreglu, que faen lo propio con 3.410 persones.
 
Los responsables de los dos sindicatos mayoritarios reconocieron que la venta de coches pue sufrir un baxón pola crisis, pero destacaron que nun pasa lo mesmo coles compañíes de reparación: “Ye l'únicu sector nel que creció'l númberu d'empreses n'Asturies”, comentó Donaire, qu'añadió que Renault y Nissan vendieron más qu'hai un añu. Mentes, García señaló que tol mundu sabe que la patronal d'estes empreses, ASPA, ye una “mandada” de la Federación Asturiana d'Empresarios (FADE), y qu'esiste “una estratexa” pa intentar doblegar a los sindicatos nel seutor del automóvil pa estendelo a otros nel futuru.

Contador Estadistiques