Día del Llibru Asturianu

El Serviciu de Normalización de Ḷḷena presenta la segunda edición de la campaña ‘N’asturianu queda guapo’

|

Seis cartelos con vocabulariu específicu sobre dellos temes componen la segunda parte de la campaña ‘N’asturianu queda guapo’. Estos materiales van repartise nes escueles y guarderíes del Conciyu de Ḷḷena.
 
El Serviciu de Normalización Llinguística de Ḷḷena presentó ayeri esta campaña nun actu na Casona de Campumanes na que tuvieron presentes, amás de Penélope Miranda, responsable del serviciu, l’autor de los cartelos, l’escritor y dibuxante Sidoro Villa Costales; y el conceyal d’Educación y Política Llingüística, Rolando Díaz. Esta segunda edición de ‘N’asturianu queda guapo’ pretende dar a conocer a los más pequeños el vocabulariu específicu de la ribera, el monte, les partes del cuerpu, les estaciones del añu, la ropa y la casería.
 
Hai que destacar que’l vocabulariu utilizáu nestos materiales ye’l de la variente llingüística de Ḷḷena “cola intención de reforzar l’asturianu de la zona”, señalen dende’l Serviciu de Normalización. Xunto a estes ferramientes de trabayu colos más pequeños, tamién van utilizase otros recursos didáuticos: dos xuegos sobre animales y plantes, y unes mariquites recortables pa trabayar el vocabulariu de la ropa. Toos estos materiales tán subvencionaos pola Conseyería de Cultura y Deportes.
 

Contador Estadistiques