El SERIDA participa nel proyeutu européu Legume Generation

L'equipu de Xenética Vexetal forma parte del consorciu d'investigación que busca impulsar l'ameyoramientu xenéticu de seis llegumes.

Esti vienres arranca'l Legume Generation, proyeutu européu nel que participa'l Servicio Regional de Investigación y Desarrollo Agroalimentario (SERIDA) pa obtener variedaes nueves más productives, con resistencies a plagues y enfermedaes, y adaptaes a los múltiples desafíos orixinaos pol cambiu climáticu. En concreto, Asturies va trabayar con fabes y arbeyos.

Financiáu con 7 millones d'euros pol programa Horizon Europe de la Xunión Europea, participen nél 32 equipos de 18 estaos que nos cuatro años y mediu siguientes van estudiar, amás de les legumes yá citaes, la soya, les llenteyes, los chichos y el trébole, toes importantes pa l'alimentación humana y animal. El doctor Lars-Gernot Otto, de la IPK de Alemaña, va liderar el consorciu nel que participa'l SERIDA.

"Les llegumes tán llamaes a xugar un importante papel na seguridá alimentaria nel curtiu plazu, especialmente nel contestu del cambiu climáticu. Son especies con baxa buelga hídrica, capaces de fixar nitróxenu atmosférico y ameyorar los suelos. Les sos granes son fáciles d'almacenar y nutritivamente son interesantes pol altu conteníu en proteínes", apuntó l'investigador Juan José Ferreira, responsable del equipo de Xenética Vexetal del SERIDA, qu'asegura qu'esta participación en Legume Generation ye “una bona noticia que consolida al equipu a nivel internacional".

Ésti ye'l cuartu proyeutu a nivel europeo nel que participa l'organismu dende'l 2017, lo que "favorez la retención de talentu científicu per aciu de la contratación d'un investigador, al empar que permite impulsar la investigación y desendolcu de dos especies d'interés" pal país, como ye'l casu de les fabes y los arbeyos.

Na semeya l'equipu que va participar en Legume Generation nun de los ivernaderos onde van desenvolvese los ensayos. D'izquierda a derecha, Ferreira; la investigadora Ana Campa; la estudiante predoctoral María Jurado; l'investigador del Área de Teunoloxía de los Alimentos, Roberto Rodríguez; y la investigadora Carmen García.