El Seminariu de Filoloxía Asturiana prepárase pal centenariu de Menéndez Pidal

L'añu 2006 van facese los 100 años de l'apaición de "El dialecto leonés" la obra de Ramón Menéndez Pidal que llevó por primer vegada l'asturianu al terrén del estudiu llingüísticu científicu. Pa celebrar el centenariu d'esta fecha histórica, el Seminariu de Filoloxía Asturiana dio anuncia de que tien preparación pa la seronda del añu 2006 la celebración d'un congresu sobre la figura del autor de "Flor nueva de romances vieyos"

El Seminariu qu'integren Xulio Viejo, Xuan Carlos Villaverde, Xuan Carlos Busto Cortina, Ramón d'Andrés, Taresa Fernández Llorences, Fernando Álvarez Balbuena, Raquel Suárez García, Xosé Nel Comba y Héctor García Gil diz que quier "reclamar pa la nuestra Universidá un papel activu nun meyor conocimientu y valoración del nuestru patrimoniu llingüísticu" apoyatura argumental en que tienen la celebración pal añu qu'entra d'esti congresu sobre la figura pidaliana y que va centrase bastante na so obra más asturianista.

Al rau de l'anuncia de celebración d'esti congresu, el grupu de profesores y investigadores qu'integren el Seminariu de Filoloxía Asturiana fai declaración d'intenciones, afitándose como depositariu de la herencia cultural vinculada al asturianu y como axente qu'ha de collaborar pa que los estudios llingüísticos asturianos s'integren a los retos de la ciencia y la sociedá modernes, beneficiándose de los progresos teóricos de la llingüística actual. El seminariu fai un llamau a tratar l'asturianu dende la seriedá nel ámbitu académicu, fuxendo lo mesmo de "prexuicios adornaos con xíriga academicista o duldosa moralina social" y de "llendar el discursu llingüísticu asturianista a la definición d'un modelu identitariu zarráu (…) más propiu de visiones mítiques que de los tan necesarios plantegamientos críticos". El seminariu fai un llamáu tamién a la creación de la titulación en filoloxía Asturiana nun tiempu en que se vive una reforma universitaria de raigón utilitarista.