El sector visitante nel derbi va tar vacíu

El Sporting refuga recibir entraes tres falar coles dos federaciones de peñes y "una significativa representación de la grada d'animación", onde s'asitien los ultres.

La falta d'alcuerdu ente'l club roxiblancu y l'Uviéu va facer que quede vacíu'l sector visitante del Carlos Tartiere. Los xixoneses nun queríen un desplazamientu tan restrictivu como los dos años anteriores y Delegación del Gobiernu estatal n'Asturies proponía facilitar el viaxe a l'afición del Sporting con un control de los socios del vieyu 'Fondo Joven'.

L'Uviéu nun aceptaba esta cuestión por temes de seguridá y defendía un viaxe controláu pa tol sportinguismu con acurtiamientu de tiempos. Énte la falta d'alcuerdu ente les partes, la Policía decidió caltener el dispositivu d'años anteriores que convoca a l'afición visitante 4 hores enantes del entamu del partíu.

Aconceyáu ayeri tres la Xunta de Seguridá, el conseyu d'alministración del Sporting, que nun tener representación nel palcu del Tartiere, "tomó la decisión unánime de nun recibir entraes pa la so venta del partíu del domingu próximu nel Carlos Tartiere a disputar ente'l nuesu primer equipu y el Real Oviedo. Tampoco nun se recibirán entraes de cortesía/protocolu", espresó nun comunicáu nel qu'esplica la so postura de defensa al "respetu a los sos aficionaos de forma igualitaria", ensin querer facer distinciones ente sectores de socios d'El Molinón. La decisión llega "tres falalo cola Federación de Peñas Sportinguistas, Unipes y una significativa representación de la grada d'animación del nuesu campu", llugar onde s'asitia Ultra Boys.

Na imaxe, zona onde s'asitia l'afición visitante nel Tartiere. Semeya obra de rsg baxo llicencia CC BY-SA 2.5 ES.