El secretu pasa de la masa a la rede

El fundador d'orixe asturianu de Telepizza ta acabante de mercar el 24,9% de la compañía de telecomunicaciones Jazztel.

Leopoldo Fernández Pujals, cubanu d'orixe asturianu, ye'l nuevu presidente y sociu de referencia de la empresa de telecomunicaciones Jazztel.

L'empresariu pagó 64 millones d'euros y quier sacar algamar una facturación penriba los 1.000 millones d'euros. D'entamu, Fernández Pujals quier invertir nuna perimportante campaña de publicidá con un slogan asemeyáu al usáu pola cadena de pizzería: "el secretu ta na rede".

Aparte d'esto, les bolses tuvieron una selmana a la baxa. Mentanto'l preciu del petróleu xube con fuercia y yá se reconoz que pue llegar a los 50 dólares, les anuncies de delles grandes empreses de rebaxar les sos previsiones de beneficios tamién tiraron p'abaxo pelos mercaos financieros.

La Reserva Federal de los Estaos Xuníos xubió un cuartu de puntu los tipos d'interés. Tal como pensaben los analistes Alan Greenspan caltién la nueva política de xuba de tipos de la Reserva Federal, que son anguaño del 1,75%. Tamién nos Estaos Xuníos dieron anuncia de los datos de pidíos de bienes duraderos ensin tresportes (+2,3%) y de los pidíos de bienes duraderos (-0,5%). N'Alemaña les estadístiques más señeres foron l'IPC d'Agostu qu'algamó'l 1,8% y l'índiz de precios a la importación que foi del 0,9%. Con ello dióse un pieslle en negativo de les bolses en Wall Street con cayida del tecnolóxicu Nasdaq hasta los 1.879,48 puntos mentanto que'l Dow Jones algamó probetayos resultaos p'asitiase nos 10.047 puntos.

Nel Vieyu Continente los índices de les bolses nun pintaron meyor, con Llondres dando'l peor pieslle poles males anuncies de les empreses de telecomunicaciones.

L'Ibex perdió la cota de los 8.000 puntos y la Bolsa de Madrid nun baxó más gracies a l'abultada xuba de Jazztel (+35,7%). L'índiz Ibex peslló la selmana pasada nos 7.986,10 puntos con unes perdes selmanales del 1,2%. El volume de negociu foi de 2.374 millones d'euros. Los valores rellacionaos colos medios son los que más xuben, sobremanera Telecinco y Antena 3. Xunta estos tamién tuvieron ganancies Repsol, Gamesa, Fadesa y SCH. Nel terrén de les perdes destaquen BBVA, Altadis y Telefónica.

Cayida perimportante nel mercáu de renta fixo colos bonos siguiendo de cerca la cotización de les divises y algamando'l bund alemán un probetayu 3,96%. Nel mercáu de divises l'euru asitióse nos 1,2250 dólares.