El secretariu xeneral de CCOO defende la importancia de la oficialidá nel estatutu

El coordinador d'IX d'Asturies Jesús Iglesias, el representante del Bloque por Asturies (BA), Rafael Palacios, y el secretariu xeneral de CC OO-Asturies, Antonio Pino, aconceyaron esti vienres pa tratar los puntos que va defender la coalición d'izquierdes na so propuesta de reforma d'estatutu d'autonomía p'Asturies.

IX entamó pel sindicatu CCOO la so ronda de contactos pa dar a conocer la so propuesta de reforma estatutaria. La organización sindical y la formación política concueyen nos más de los puntos que se conseñen na propuesta ellaborada por IX-BA y dambes organizaciones defendieron que la reforma del Estatutu d'Asturies ha tener un claru "calter social".

El coordinador xeneral d'IX Jesús Iglesias sorrayó l'alcance de les propuestes d'IX en materia d'emplegu y vivienda, mientres que'l representante del BA Rafael Palacios aseguró que la so propuesta d'estatutu "reconoz el derechu a vivir y trabayar n'Asturies". El secretariu xeneral de CCOO Antonio Pino dixo que'l testu d'IX-BA aubultába-y positivu y que los puntos inxertos nel mesmu yeren mui asemeyaos a los que se conseñen nes conclusiones del últimu congresu de CC.OO. d'Asturies, rescamplando ente ellos "la importancia del inxerimientu de la oficialidá de la llingua, la posibilidá de disolución de la Xunta Xeneral y la convocatoria d'elecciones anticipaes xunto cola regulación de les iniciatives llexislatives populares".

El secretariu de la central sindical criticó al PP pola so postura contraria a qu'entame'l procesu de reforma del estatutu, una crítica que reforzó Rafael Palacios, que declaró que "el PP ta estrapayando'l derechu que tienen los asturianos a tener un estatutu nuevu". Los responsables d'IX-BA declararon tamién que, contra les declaraciones optimistes del Presidente asturianu nesti sentíu, diba ser difícil facer el procesu de reforma estatutaria nesta llexislatura, apuntando Iglesias que pa ello diba haber que facer hábil el mes de xunetu na Xunta Xeneral. Inda más escépticu, anque nesti casu sobre les posibilidaes de consensu na reforma, foi Rafael Palacios, que declaró que'l PSOE "actua n'Asturies como lo fai'l PP n'España al negase al diálogu".