El secretariu d'organización de la FSA píde-y al PP qu'asitie la so posición sobre la oficialidá

El secretariu d'organización de la FSA, Jesús Gutiérrez, reclamó-y ayeri al PP qu'esclarie la posición oficial del partíu tocante al asturianu. El responsable socialista afitó la postura socialista de refuga a la oficialidá "pol elementu d'imposición que lleva arreyada" y pidió-yos a los populares que dexaren claro cual ye'l so apueste na cuestión llingüística en cuantes que la d'IX tamién ye clara y porque la posición de los populares va ser "determinante" a la hora d'entamar la reforma del estatutu d'autonomía.

Gutiérrez esplicó que "nun valen medies tintes" nesta cuestión y entrugose si les últimes declaraciones a favor del asturianu de políticos populares como Gabino de Lorenzo, qu'asoleyó una carta n'asturianu nel diariu La Nueva España, obedecíen a una postura sincera a favor de la oficialidá o si yeren "un brinde pa ganase al electoráu". El dirixente socialista reconocía asina implicitamente nes sos afirmaciones la relevancia que podría tener nes votaciones del próximu 27 de mayu la existencia d'un votu movilizáu pola cuestión llingüística.