El Santander métese ente los 10 mayores bancos del mundu

El Bancu Santander (SCH) ta acabante de recibir el preste del sestu bancu británicu por activos, l'Abbey National, pa la so venta al SCH pol importe de 12.800 millones d'euros .

Con esta operación el bancu d'Emilio Botín algama les 750 oficines y 18 millones de clientes nel Reinu Xuníu y faise'l cuartu bancu d'Europa y décimu del mundu. L'Abbey National ye lider en créditos al consumu nes Islles Britániques colo que la fusión da tamién el mayor bancu européu nesta rama. Ello supón l'entamu de movimientos corporativos d'una banca europea con gana de fusiones y compres.

La rempuesta na Bolsa de Llondres namás sabese del interés del SCH foi la xuba del Abbey mentanto qu'a los inversores del SCH nun-yos prestó, lo que tiró p'abaxo pel índiz madrilanu. Ello ye que, en conociéndose los detalles de la operación les coses entornaron pa la otra parte y agora ye la bolsa inglesa la que deprecia les acciones del bancu británicu

Otramiente, la selmana nes bolses foi bien probetaya ante la xuba del petroleu, el descansu estival de bona parte de la comunidá inversora y sobremanera los febles datos macroecónomicos. Nel Vieyu Continente les principales bolses de Llondres, Francfort y París pesllaron a la baxa, y al otru llau del Atlánticu Nueva York nun tuvo meyor selmana. L'índiz Dow Jones peslló nos 9.962,22 puntos con cayida del 0,88% y el tecnolóxicu Nasdaq tamién peslló en perda, con una cayida del 2,12% hasta los 1.849,09 puntos. La selmana pasada nun hebo munches estadístiques, pero nel ambiente siguen les duldes pola recuperación económica de los Estaos Uníos. Na Zona Euru rescamplaron el datu del PIB del Reinu Uníu que foi nel segundu semestre del +0,9%, el datu de ventes minoristes d'Italia con una cayida del 0,6% mui perbaxo les previsiones, y la tasa de desempléu nel Estáu Español del 10,93% meyor de lo estimao polos analistes. Nos Estaos Xuníos los datos más señeros foron les previsiones empresariales de Microsoft, eBay, Amazon, Coca Cola y otres blue chips que nun-yos prestaron a los inversores ente los topes de xorrecimientu empresarial.

L'Ibex-35 algamó les mayores perdes nos últimos dos meses.

L'anuncia de la selmana que foi la operación del SCH tiró p'abaxo per tol mercáu madrilanu. Asina, la Bolsa de Madrid peslló nos 7.848,80 puntos, mui perbaxo de la cota psicolóxica de los 8.000 y baxando tamién del encontu de los 7.900, que los analistes nun contaben con perder. Ente les perdes destaquen el SCH con una cayida del 4%, Ebro Puleva dempués de dar anuncia de la OPA amistosa sobre la primer empresa arrocera d'Estaos Xuníos, Iberia, NH Hoteles y Prisa. Nel terrén positivu pero con probetayes xubes destaquen la matriz Telefónica, Gamesa, Banco Popular y Altadis.

Cayida del euru nel mercáu de divises dempués d'unes anuncies del Presidente de la Reserva Federal Alan Greenspan sobre les posibilidaes de da-y fuercia al procesu de xuba de tipos d'interés nos Estaos Xuníos.

Con too y con ello la divisa europea lleva más d'un mes llargu con una cotización muy sólida. La selmana pasada l'euru asitiose nos 1,2125 dólares unidá. Nel mercáu de renta fixo nun hebo cambeos importantes calteniendo los bonos una rentabilidá penriba'l 4%. El petroleu sigue ensin frenu y la selmana pasada mangóse penriba los 36 dólares barril. Otramiente, la xuba del dólar tiró p'abaxo pel metal mariello hasta los 389,20 dólares, la cotización más baxa en cinco selmanes.