El Sabil trai la folixa al iviernu

L'hotel El Sabil nel conceyu de Santu Adrianu entama otra vuelta un programa d'actividaes al rodiu de la música asturiana, la gastronomía y la inevitable folixa. "Felpeyu" va ser la estrella d'esta Folixa N'El Sabil.

Yá na selmana santa d'anguaño n'El Sabil tuvieron la bona idea entamar un pequeño conciertu coles actuaciones de "Tuenda" y "Niundes". Esta vegada iguaron un programa más ambiciosu que va ocupar trés díes del próximo fin de selmana. El vienres cinco de payares va mandar la gaita col "I Concursu de Gaiteros Valles del Oso", que tien un primer premiu de 250 euros. Dempués de la competición va tocar la bona gaitera bretona-asturiana Marie Le Cam a la que ye difícil vela ensin la so gaita peles nueches folk d'Asturies. Dempués l'escenariu va quedar llibre pa tolos músicos que-yos pete tocar y montar folixa hasta cuando se pueda.

El sábadu seis a les 20.00 hores va haber, yá tamos n'época d'ello, un magüestu onde vamos poder prebar productos de Care Salas S.L. A les 23:00 hores va haber l'actuación de los xixoneses "Felpeyu", pa dexar depués que la nueche s'allargue tolo que quiera. Al día siguiente va haber una sesión vermouth animada con una bandina tradicional, la meyor forma de qu'entre la fame y enfrentase a les primeres xornaes gastronómiques de Santu Adrianu, fabada, pote asturianu, corderu, pitu caleya y arroz con lleche tienen que sirvir pa recuperar fuerces depués d'estos trés díes de Folixa n'El Sabil.