El Sabil entama la nueche más llarga con trés grupos

Col nome "La nueche más llarga" l'hotel El Sabi entama un
conciertu esti sábadu día 6 nel que va axuntase trés
grupos d'apaición de recién pero con músicos con
esperiencia. Amás, la nueche va tener el pieslle de la bandina La
Curuxa.



Los grupos que van tocar esti sábadu seis son
DRD,
Ígor
Medio y Lisardo Prieto y el tríu Tuenda, los trés yá bien
conocíos polos aficionaos por sacar l'añu pasáu o
anguaño'l so primer discu. Los trés ufierten un folk
acústicu que vieno a llamase Folk de Cámara, formaciones
pequeñes de dos o trés persones que da más llibertá
a los músicos pa desenvolver la so técnica interpretativa. Con
too y con ello ente los trés hai bastantes diferencies, DRD apuesta
polos amiestos de temes tradicionales con dalgunes composiciones propies,
Lisardo y Ígor por pone-y música a poemes d'escritores asturianos
arriendes de dalgunes pieces instrumentales, y por último, Tuenda
llévanos per una amuesa de la tradición vocal asturiana al
traviés de la voz de Xosé Ambás y l'acompañamientu
del bouzouky d'Elías García y la xiblata de Pepín de
Muñalén. La nueche va finar con un toque más folixeru
entá cola actuación de la bandina la Curuxa.



Esta Nueche más llarga va entamar a les 22:30 y s'espera que dure hasta
que los músicos y los instrumentos aguanten, Poro, y pa poder descansar
de tanta folixa, se puede dormir nel propiu hotel o acampar de baldre al llau
del mesmu. Pa les dos opciones hai que ponese en contactu col hotel al
traviés de la so páxina
web.