El sábadu celébrase la prueba de conocencia de xineru de l'ALLA

Hasta'l xueves ye posible matriculase pal primeru de los dos esámenes que la institución académica entama tolos años.

“L'Academia de la Llingua Asturiana, sabiendo'l fondu interés de munches persones de llograr que se reconoza la so conocencia de la llingua y manifestar asina'l so fondu amor al idioma asturianu”, ta acabante d’abrir la matrícula del primer de los dos pruebes que celebra tolos años –la segunda ye en mayu–, que sirve pa que tolos ciudadanos interesaos puedan algamar el documentu qu’afita la so conocencia d’asturianu nel nivel 1 o básicu. Pa ello han d’amosar un dominiu tanto de les normes llingüístiques como de la situación actual del idioma y del procesu de normalización nel que ta inxertu.

La prueba cuenta con dos partes, escrita y oral. La primera va principiar con un dictáu, pa continuar con una torna, una serie d’exercicios gramaticales y una redaición. Darréu, l’aspirante a algamar el títulu de conocencia pasará a otra sala u caltendrá una conversación breve con dalguna persona del xuráu que valorará’l so dominiu oral del idioma.

Les persones interesaes en facer la prueba de conocencia tienen de plazu hasta esti xueves pa formalizar la matrícula na sede de la institución (L’Águila 10, Uviéu), con un preciu de 12 euros, nel horariu siguiente: de 9 a 15 hores y de 16 a 19 hores. L’esame va comenzar a les 9.30 hores del sábadu y va celebrase nel propiu llar de l'ALLA.