El sábadu va dase a conocer el proyeutu ‘POITER’, de Pablo Carrera

Gaiteros de dientro y fuera d’Asturies van tar presentes el sábadu en La Pola Llaviana p’acompañar a Pablo Carrera na presentación del proyeutu ‘POITER’. Según adelanta’l músicu llavianés, ésti “revolucionará’l mundu de la gaita”.

Les redes sociales lleven alredor d’un mes acoyendo una campaña promocional d’esta iniciativa, que va desvelase finalmente’l sábadu, a les 12 hores, na Casa de la Cultura de La Pola Llaviana. Nesi actu, Carrera va tar acompañáu por Xuacu Amieva, l’escocés Fred Morrison, el gallegu Pablo Devigo y el cántabru Sergio Sordo, amás de los componentes de la Banda Gaites Conceyu de Llangréu. José Luis Remis, asesor d’ enseñu de Llingua Asturiana de la Conseyería d’Educación, Cultura y Deporte va presentar l’eventu, nel que tamién van intervenir Alfonso Fernández, direutor del Muséu de la Gaita, y les persones que van facer posible ‘POITER’, esto ye, Carrera y Pelayo Gallego. Hai que destacar que tienen prevista la so asistencia a la presentación Adrián Barbón, alcalde de Llaviana, y Alejandro Calvo, viceconseyeru de Cultura.

Tamién el sábadu va activase la páxina web personal del gaiteru de Duerna, www.pablocarrera.com. Los usuarios de la rede van poder conocer al traviés d’ella tolos aspeutos del proyeutu ‘POITER’ y la trayeutoria profesional de Carrera, nietu del gaiteru ‘El Carreru’. Con tres llustros tocando l’instrumentu, esti músicu llavianés ye anguaño gaiteru oficial del Concursu de Tonada de Samartín del Rei Aurelio y del Concursu Cuenca del Caudal, trabaya como profesor, dirixe la Banda Gaites Conceyu de Llangréu y forma parte de la banda del artista marroquín Med Jbara y de la Quinta del Nalón.